A TERRA DO PRESTE XOÁN

Hai uns días soubemos que o mesmísimo Mr. T era un visitante asiduo deste blogue. Vaia esta canción, War Pigs (Os porcos da guerra) como homenaxe e tributo da maior admiración.

Todos coñecedes a historia de Mr. T. Enrolado no famosísimo Equipo A, un grupo de ex-combatentes do Vietnam que se adica a axudar aos máis débiles polos Estados Unidos adiante, as autoridades federais persíguenos por delitos que nunca cometeron.

Pois ben, Mr. T: nunca debiches ter ido a aquela guerra. Como todas as guerras, esta foi unha guerra inxusta. O poderosísimo exército estadounidense masacrou aos vietnamitas ao longo da guerra (1963-75), mentres perdía cincuenta mil soldados, na súa maioría negros.

A Guerra do Vietnam, que enfrontou ao exército estadounidense coa guerrilla comunista deste país asiático, foi condenada por moita xente dentro dos propios EEUU e en Europa. O rock está cheo de cancións contra esta guerra (non tedes máis que ir a por Bob Dylan) e a nos gústanos especialmente esta, War Pigs, do grupo de heavy Black Sabbath. Se ledes a letra (enlazo aquí ao texto orixinal en inglés e poño a tradución abaixo), comprobaredes como está chea de acusacións gravísimas contra os políticos da época.

Por certo que, aínda que a canción editouse en 1970, prefiro ofrecervos esta versión dun concerto de 1978.

Os xenerais reuniron as súas multitudes
como as bruxas nas misas negras.
Mentes malvadas que planexan a destrución,
magos na construción da morte.
Nos campos arden os corpos
mentres a máquina da guerra sigue botando
a morte e o odio sobre o xénero humano,
envelenando os seus cerebros lavados
Oh, Señor, si!

Os políticos agóchanse,
só comezaron a guerra,
por que deberían ir eles pelexar?
Déixanllo todo aos pobres.
O tempo falará das súas poderosas mentes
facendo a guerra só por diversión,
tratando á xente como peóns do xadrez.
Agarda a que veña para eles o día do Xuízo Final.
Agora deixa de xirar o mundo na escuridade
mentres a máquina da guerra continúa a queimarse.
Xa non teñen o poder os porcos da guerra,
a Man de Deus golpeou:
Deus chama ao Día do Xuízo.
Sobre os seus xeonllos arrástranse os porcos da guerra
pedindo perdón polos seus pecados.
Rindo, Satán estende as súas ás.
Oh, Señor, si!